(दुर्घटनाको कारण पत्ता लगाउन सात दिनभित्र प्रतिवेदन बुझाउने गरी पाँच सदस्यीय छानबिन समिति गठन)
काठमाडौं,२७ कार्तिक । मकवानपुरको भीमफेदी गाउँपालिका–६, चिसापानीगढीस्थित भीमफेदी–कुलेखानी–काठमाडौं सडकखण्डमा भएको भीषण यात्रुवाहक सवारी दुर्घटनाप्रति सरकारले गहिरो दुःख व्यक्त गर्दै मृतकका परिवारलाई क्षतिपूर्ति तथा घाइतेहरूको उपचार व्यवस्थापनलाई उच्च प्राथमिकतामा राखेको जनाएको छ।
प्रधानमन्त्री तथा मन्त्रिपरिषद्को कार्यालयले शुक्रबार सार्वजनिक गरेको विज्ञप्तिअनुसार गत कात्तिक २६ गते बिहीबार बिहान काठमाडौं–सर्लाही रुटमा सञ्चालन हुँदै आएको मधेश प्रदेश ०३–००१ ज ०८८० नम्बरको यात्रुवाहक सवारीसाधन अनियन्त्रित भई सडकबाट करिब ५०० मिटर तल खस्दा १४ जनाको दुःखद मृत्यु भएको थियो भने ६ जना घाइते भएका थिए।
छठ पर्व मनाउन आफ्नो घर फर्किने क्रममा रहेका यात्रुहरू दुर्घटनामा परेका थिए। दुर्घटनामा ज्यान गुमाउनेमध्ये १३ जना सर्लाहीको चक्रघट्टा गाउँपालिका–४, सुन्दरपुरका स्थानीय बासिन्दा रहेका छन् भने एक जना सवारीचालक सर्लाहीकै कविलासी नगरपालिकाका बासिन्दा रहेको प्रधानमन्त्री तथा मन्त्रिपरिषद्को कार्यालयले जनाएको छ।
घाइतेको उपचारमा सरकारको विशेष चासो
दुर्घटनामा घाइते भएकाहरूको उपचारलाई सरकारले उच्च प्राथमिकतामा राखेको जनाएको छ। उपचाररत घाइतेहरूको स्वास्थ्योपचारमा कुनै किसिमको कमी हुन नदिन सम्बन्धित अस्पतालहरूलाई आवश्यक निर्देशन दिइसकिएको विज्ञप्तिमा उल्लेख छ।
घाइतेमध्ये तीन जना उपचारपछि अस्पतालबाट डिस्चार्ज भइसकेका छन् भने बाँकी तीन जनाको चितवनस्थित मनकामना अस्पताल र ललितपुरस्थित मेडिसिटी अस्पतालमा उपचार भइरहेको छ।
सरकारले घाइतेहरूको उपचारलाई प्रभावकारी बनाउन तथा उनीहरूको स्वास्थ्य अवस्थाबारे आवश्यक समन्वय गर्न सम्बन्धित निकायलाई निर्देशन दिएको जनाएको छ।
मृतकका परिवारलाई क्षतिपूर्ति र बिमा रकम उपलब्ध गराइने
दुर्घटनामा ज्यान गुमाउनेका परिवार तथा घाइतेहरूले कानुनबमोजिम पाउनुपर्ने आर्थिक सहायता, क्षतिपूर्ति र बिमा रकम उपलब्ध गराउने प्रक्रिया सरकारले अघि बढाएको छ।
सवारी तथा यातायात व्यवस्था ऐन, २०४९ तथा प्रचलित बिमा कानुनअनुसार घाइतेहरूको उपचार खर्च र मृतकका परिवारले पाउने क्षतिपूर्ति तथा बिमा रकम यथाशीघ्र उपलब्ध गराउन सम्बन्धित सवारीधनी, यातायात व्यवसायी र बिमा कम्पनीसँग समन्वय भइरहेको प्रधानमन्त्री तथा मन्त्रिपरिषद्को कार्यालयले स्पष्ट पारेको छ।
पीडित परिवारले कानुनबमोजिम पाउनुपर्ने सुविधा र राहत उपलब्ध गराउन आवश्यक प्रक्रिया छिटो सम्पन्न गर्न सम्बन्धित पक्षलाई परिचालन गरिएको जनाइएको छ।
दुर्घटनाको कारण पत्ता लगाउन पाँच सदस्यीय छानबिन समिति
यसैबीच, दुर्घटना किन र कसरी भयो भन्ने वास्तविक कारण पहिचान गर्न सरकारले पाँच सदस्यीय छानबिन समिति गठन गरेको छ।
मकवानपुरका सहायक प्रमुख जिल्ला अधिकारीको संयोजकत्वमा गठन गरिएको समितिलाई दुर्घटनाको वस्तुस्थिति अध्ययन, सम्भावित कारणहरूको विश्लेषण तथा आगामी दिनमा यस्ता दुर्घटना दोहोरिन नदिन आवश्यक सुझावसहितको प्रतिवेदन सात दिनभित्र पेश गर्ने जिम्मेवारी दिइएको छ।
समितिले दुर्घटनासँग सम्बन्धित विभिन्न पक्षको अध्ययन गरी दुर्घटनाको कारण पहिचान गर्नुका साथै भविष्यमा यस्ता हृदयविदारक घटना रोक्न अपनाउनुपर्ने उपायबारे सरकारलाई सुझाव दिने अपेक्षा गरिएको छ।
पीडित परिवारलाई सहयोग गर्ने सरकारको प्रतिबद्धता
छठ पर्व मनाउन घर फर्किने क्रममा एउटै गाउँका १३ जनासहित १४ जनाले ज्यान गुमाउनुपरेको यस घटनाले सिंगो परिवार, गाउँ र समुदायलाई गहिरो शोकमा डुबाएको छ।
सरकारले दुर्घटनाबाट प्रभावित परिवारलाई आवश्यक सहयोग तथा सहजीकरण गर्न प्रतिबद्धता व्यक्त गर्दै मृतकहरूप्रति भावपूर्ण श्रद्धाञ्जली अर्पण गरेको छ। साथै शोकसन्तप्त परिवारजनप्रति हार्दिक समवेदना व्यक्त गर्दै उपचाररत घाइतेहरूको शीघ्र स्वास्थ्यलाभको कामना गरेको छ।
प्रधानमन्त्री तथा मन्त्रिपरिषद्को कार्यालयका सहसचिव एवं प्रवक्ता हेमराज अर्यालद्वारा जारी विज्ञप्तिमा सरकारले पीडित परिवारलाई आवश्यक सहयोग उपलब्ध गराउने, घाइतेहरूको उपचार सुनिश्चित गर्ने र दुर्घटनाको वास्तविक कारण पत्ता लगाई भविष्यमा यस्ता घटना न्यूनीकरणका लागि आवश्यक कदम चाल्ने प्रतिबद्धता जनाएको छ।
