वीरगञ्ज, १६ असोज ।
पर्सा प्रहरीले वीरगञ्जमा भएको गोल्डेन भन्ने युवकको हत्यामा संलग्न पाँच जना आरोपीलाई पक्राउ गरेको छ। पर्सा प्रहरी प्रमुख प्रहरी उपरीक्षक (एसपी) सुदिप राज पाठकको नेतृत्वमा खटिएको विशेष प्रहरी टोलीले केही घण्टामै घटनामा संलग्न दरिन्दे खुँखार समूहका युवाहरूमाथि कारबाही गर्दै पक्राउ गरेको हो।
घटनाको विवरण
मिति २०८२ असोज १४ गते राति करिब ११:३० बजे वीरगञ्ज महानगरपालिका–१० गीता मन्दिर नजिक अपरिचित व्यक्तिहरूबीच झगडा र कुटपिट हुँदा गोल्डेन भनेर चिनिने २४ वर्षीय युवक घाइते भएका थिए। उनलाई तत्कालै उपचारका लागि नारायणी अस्पताल लगिएको थियो। तर, राति ११:५० बजे डाक्टरले मृत घोषणा गरेका थिए।
प्रहरीलाई टेलिफोनमार्फत घटना जानकारी प्राप्त भएपछि प्रहरी उपरीक्षक पाठकको प्रत्यक्ष कमाण्डमा विर्ताबाट प्रहरी निरीक्षक निरोज चौलागाई नेतृत्वको ३२ जनाको टोली खटिएको थियो। टोलीले घटनास्थलको मुचुल्का तयार पार्दै शवलाई पोस्टमार्टमका लागि नारायणी अस्पताल पठाएको र पोस्टमार्टमपछि मृतकको शव उनका बुवा राजन साह कानुलाई जिम्मा दिएको प्रहरीले जनाएको छ।
घटनाको पृष्ठभूमि
बारा परवानीपुर गाउँपालिका–९ का मूल घर भई हाल वीरगञ्ज–१० बसोबास गर्दै आएका २० वर्षीय शिवम साह कानु, जो गोल्डेन नामले परिचित थिए, गहवामाई मेला हेर्न भनी घरबाट निस्केका थिए। मेलामा पुगेपछि उनी केही युवकहरूसँग विवादमा परे। प्रहरीका अनुसार, मृतक र उक्त समूहबीच विगतमा समेत बारम्बार झगडा हुँदै आएको थियो। सोही रिसइबीका कारण मौका पाएर विपक्षी समूहले गोल्डेनलाई हात, मुक्का र बाँसका भाठ्ठाले कुटपिट गरी गम्भीर घाइते बनाएका थिए।
पक्राउ परेका आरोपीहरू
प्रहरीले घटनामा संलग्न भएको प्रमाणित पाँच जनालाई नियन्त्रणमा लिएको छ। पक्राउ परेका युवाहरू यसप्रकार छन् :
- गौतम पटेल, १९ वर्ष, वीरगञ्ज–२४, रामगढवा
- सुभांकर चौरसिया, २० वर्ष, वीरगञ्ज–२४, रामगढवा
- अमिरी पटेल (करण प्रसाद पटेल), २२ वर्ष, वीरगञ्ज–२४, रामगढवा
- चन्दन चौरसिया, २४ वर्ष, वीरगञ्ज–२४, रामगढवा
- अमन पटवा, १९ वर्ष, वीरगञ्ज–२४, रामगढवा
उनीहरूलाई वीरगञ्ज र भारत सिमाना नजिकैको भिष्वा भन्ने स्थानबाट पक्राउ गरिएको प्रहरीले जनाएको छ।
अनुसन्धान र संकलित प्रमाण
घटनाको छानबिनका क्रममा प्रहरीले विभिन्न प्रमाण संकलन गरेको छ।
- घटनास्थलमा रहेको CCTV फुटेज/भिडियो रेकर्ड
- संचार विवरण (CDR) को विश्लेषण
- अन्य प्रत्यक्ष र परोक्ष प्रमाणहरूको आधारमा आरोपितहरूको पहिचान
यी प्रमाणका आधारमा पक्राउ परेकामाथि कर्तव्य ज्यान सम्बन्धी कसूरमा अनुसन्धान भइरहेको प्रहरीले जानकारी दिएको छ।
घटनाको मूल कारण
प्रहरीका अनुसार, यस घटनाको प्रमुख कारण यसप्रकार रहेका छन् :
- विगतका विवाद र पुरानो रिस–इबी
- आफुलाई खतरनाक देखाउने (ग्याङस्टार बन्ने) प्रवृत्ति
- व्यक्तिगत दुश्मनी र प्रतिशोध
पर्सा प्रहरी प्रवक्ता डिएसपी हरि बहादुर बस्नेतका अनुसार, घटनामा संलग्न अन्य व्यक्तिहरू भए/नभएकोतर्फ पनि अनुसन्धान भइरहेको छ।
