(वीरगञ्जको रजतजयन्ती चोकबाट भन्सार छली गरी भित्र्याइएका कपडा तथा खाद्यान्नसहितका सामान नियन्त्रणमा)
वीरगञ्ज, असोज २७। पर्सा प्रहरीले भन्सार छली गरी भारतबाट नेपाल भित्र्याइएका रु. २० लाख ९० हजार ४१० बराबरका विभिन्न सामान बरामद गरेको छ।
जिल्ला प्रहरी कार्यालय पर्साका अनुसार २०८३ असोज २६ गते अपराह्न करिब ४:३० बजे वीरगञ्ज महानगरपालिका–१६ स्थित रजतजयन्ती चोकबाट भन्सार छली गरी चोरी पैठारीमार्फत भित्र्याइएका सामान बरामद गरिएको हो।
बरामद गरिएका सामानमा सर्टिङ–सुटिङका कपडा, लेडिज कुर्ता–सुरुवाल, बालबालिकाका विभिन्न प्रकारका कपडा तथा खाद्यान्नलगायतका मालसामान रहेका छन्। ती सामानको अनुमानित मूल्य रु. २० लाख ९० हजार ४१० रहेको प्रहरीले जनाएको छ।
प्रहरीले बरामद गरेका उक्त सामान आवश्यक कानुनी कारबाहीका लागि २०८३ असोज २७ गते वीरगञ्ज भन्सार कार्यालय, पर्सामा बुझाएको छ।
सीमा क्षेत्रमा हुने अवैध चोरी पैठारी तथा भन्सार छली नियन्त्रण गर्ने उद्देश्यले प्रहरीले निगरानी र चेकजाँचलाई निरन्तरता दिँदै आएको छ। पछिल्लो बरामदगीले भन्सार छली गरी अवैध रूपमा सामान भित्र्याउने गतिविधिमाथि निगरानी बढाइएको संकेत गरेको छ।
जिल्ला प्रहरी कार्यालय पर्साका प्रवक्ता तथा सूचना अधिकारी प्रहरी नायब उपरीक्षक चक्रबहादुर मल्लले उक्त घटनाबारे जानकारी दिएका हुन्।
