वीरगञ्ज, २८ कार्तिक ।पवित्र छठ पर्वको अवसर पारेर समाजसेवी तथा राजनीतिज्ञ शेख रुस्तमले करिब १०० जना गरिब, असहाय तथा विपन्न परिवारलाई साडी, खाद्यान्न सामग्रीसहित नगद सहयोग वितरण गरेका छन्।
वीरगञ्ज महानगरपालिका–१३ अन्तर्गत मुडली नयाँ टोला, मुडली र राधेमाई क्षेत्रमा आयोजित विशेष कार्यक्रममा उनले आर्थिक अवस्था कमजोर भएका परिवारलाई लक्षित गर्दै उक्त सहयोग प्रदान गरेका हुन्।
छठ पर्वलाई हर्षोल्लासका साथ मनाउन आर्थिक अभावका कारण समस्या भोगिरहेका विपन्न परिवारलाई केही राहत पुगोस् भन्ने उद्देश्यले शेख रुस्तमले सहयोग अभियान सञ्चालन गरेका हुन्। पर्वको समयमा आवश्यक सामग्री तथा आर्थिक सहयोग प्राप्त भएपछि स्थानीय विपन्न परिवारमा खुसी छाएको छ।
सामाजिक सेवाको भावनाबाट प्रेरित भएर गरिएको यस मानवीय पहलले समाजमा आपसी सद्भाव, सहयोग र सामाजिक उत्तरदायित्वको भावना थप मजबुत बनाउने विश्वास गरिएको छ।
यसैबीच, नेपाल मुस्लिम पत्रकार संघका अध्यक्ष मन्सुर खानले शेख रुस्तमको यस सामाजिक कार्यको प्रशंसा गर्दै विपन्न तथा असहाय परिवारलाई पर्वको समयमा सहयोग गर्नु सराहनीय कदम भएको बताए। उनले समाजमा रहेका आर्थिक रूपमा कमजोर वर्गको पीडा बुझेर सहयोगको हात अघि बढाउनु सामाजिक सेवाको महत्वपूर्ण उदाहरण भएको उल्लेख गरे।
त्यस्तै, स्थानीय बासिन्दाहरूले पनि छठ पर्वको अवसरमा आफूहरूलाई साडी, खाद्यान्न सामग्री तथा नगद सहयोग उपलब्ध गराएकोमा शेख रुस्तमप्रति कृतज्ञता व्यक्त गरेका छन्।
पर्व तथा उत्सवहरूलाई केवल व्यक्तिगत खुसीमा सीमित नराखी गरिब, असहाय र विपन्न समुदायसँग खुसी बाँड्ने संस्कृतिको विकास गर्नुपर्ने सन्देशसमेत यस सहयोग कार्यक्रमले दिएको छ।
छठ पर्वको पावन अवसरमा विपन्न परिवारको मुहारमा खुसी ल्याउने शेख रुस्तमको यो मानवीय पहल सामाजिक सद्भाव र सेवाभावको उदाहरण बनेको छ।
