वीरगञ्ज,१५ असोज । आज अन्तर्राष्ट्रिय ज्येष्ठ नागरिक दिवस विभिन्न कार्यक्रम गरी मनाइँदैछ। ज्येष्ठ नागरिकप्रति सम्मान, सुरक्षा, संरक्षण र उनीहरूको अधिकार सुनिश्चित गर्ने उद्देश्यले हरेक वर्ष अक्टोबर १ तारिखमा यो दिवस मनाउने गरिन्छ।
यस वर्षको सन्देश “ज्येष्ठ नागरिकको सुरक्षा र सम्मान, सुरक्षित र सभ्य समाजको साझा अभियान” रहेको छ। ज्येष्ठ नागरिकको अनुभव, ज्ञान र योगदानलाई समाजको महत्वपूर्ण सम्पत्तिका रूपमा स्वीकार गर्दै उनीहरूको सम्मानजनक जीवनयापनका लागि परिवार, समुदाय र राज्यको साझा भूमिका आवश्यक रहेकोमा जोड दिइएको छ।
ज्येष्ठ नागरिकले परिवार, समाज र राष्ट्र निर्माणमा पुर्याएको योगदानको कदर गर्दै उनीहरूलाई माया, सम्मान र संरक्षण प्रदान गर्नु सबैको दायित्व हो। उमेर बढ्दै जाँदा स्वास्थ्य, आर्थिक, सामाजिक तथा सुरक्षासम्बन्धी चुनौतीहरू थपिन सक्ने भएकाले ज्येष्ठ नागरिकमैत्री वातावरण निर्माण गर्न आवश्यक रहेको सरोकारवालाहरू बताउँछन्।
ज्येष्ठ नागरिकमाथि हुने उपेक्षा, दुर्व्यवहार तथा हिंसा न्यूनीकरण गर्दै उनीहरूको अधिकार, सामाजिक सुरक्षा र सम्मानजनक जीवन सुनिश्चित गर्न परिवारदेखि स्थानीय तह, समुदाय तथा राज्यका सम्बन्धित निकायसम्मको सक्रिय सहभागिता आवश्यक छ।
ज्येष्ठ नागरिकको ज्ञान, सीप र जीवनअनुभवलाई नयाँ पुस्तासँग जोड्दै पुस्ताबीचको सम्बन्ध मजबुत बनाउन सके सभ्य, सुरक्षित र समावेशी समाज निर्माणमा महत्वपूर्ण योगदान पुग्ने विश्वास गरिएको छ।
ज्येष्ठ नागरिकको सुरक्षा र सम्मान केवल एक दिनको अभियान नभई हरेक दिनको सामाजिक जिम्मेवारी बन्नुपर्ने सन्देशसहित अन्तर्राष्ट्रिय ज्येष्ठ नागरिक दिवस मनाइँदैछ।
