(असोजमा दोस्रो बनेको मधेश प्रदेश प्रहरी कार्तिकमा शीर्ष स्थानमा उक्लियो, अपराध नियन्त्रणदेखि सीमा सुरक्षासम्मको कार्यसम्पादनमा सुधार)
मधेस प्रदेश , ६ मंसिर। नेपाल प्रहरीको मासिक कार्यसम्पादन मूल्याङ्कनमा मधेश प्रदेश प्रहरीले देशभरका सातवटै प्रदेश प्रहरी कार्यालयलाई पछि पार्दै कार्तिक महिनामा पहिलो स्थान हासिल गरेको छ। डीआईजी ओम अधिकारीको नेतृत्वमा रहेको मधेश प्रदेश प्रहरी कार्यालय जनकपुरले असोज महिनामा दोस्रो स्थान प्राप्त गरेको थियो।
एक महिनामै दोस्रो स्थानबाट शीर्ष स्थानमा उक्लिएको मधेश प्रहरीको यो उपलब्धिलाई संगठनभित्र नेतृत्वको प्रभावकारिता र मातहतका प्रहरी इकाइको सक्रियतासँग जोडेर हेरिएको छ। सीमावर्ती सुरक्षा चुनौती, घना जनघनत्व र अपराध नियन्त्रणको जटिल जिम्मेवारी बोकेको मधेश प्रदेशमा प्रहरीको कार्यसम्पादन सुधार हुनु महत्वपूर्ण उपलब्धिका रूपमा लिइएको छ।
नेपाल प्रहरी प्रधान कार्यालयले अपराध नियन्त्रण, अनुसन्धान, शान्ति सुरक्षा, सेवा प्रवाह, प्रशासनिक अनुशासन, मानवअधिकार, फरार प्रतिवादी पक्राउ, राजस्व असुली, सीमा सुरक्षा तथा कर्मचारी गुनासो व्यवस्थापनलगायतका सूचकका आधारमा प्रदेश प्रहरी कार्यालयहरूको मासिक मूल्याङ्कन गर्दै आएको छ। यिनै सूचकमा उत्कृष्ट नतिजा प्राप्त गर्दै मधेश प्रहरीले कार्तिक महिनाको मूल्याङ्कनमा पहिलो स्थान सुरक्षित गरेको हो।
नेतृत्वको निर्देशनदेखि कार्यान्वयनसम्म निगरानी
डीआईजी अधिकारीले प्रदेश प्रहरीको नेतृत्व सम्हालेपछि कार्ययोजना कार्यान्वयन, नियमित अनुगमन र मातहतका कार्यालयको जिम्मेवारी मूल्याङ्कनलाई प्राथमिकता दिएको बताइएको छ। निर्देशन दिएर मात्र नभई त्यसको कार्यान्वयन अवस्था बुझ्ने र कमजोरी सुधार्न पहल गर्ने कार्यशैलीले संगठनको कार्यसम्पादनमा सकारात्मक प्रभाव पारेको देखिन्छ।
प्रदेश प्रहरी कार्यालयका व्यवस्थापकीय टोलीमा एसएसपी प्रभु ढकाल, एसपी भेषराज रिजाललगायतका अधिकारीको सक्रियता पनि उपलब्धिको महत्वपूर्ण पक्षका रूपमा रहेको छ। आठवटै जिल्ला प्रहरी कार्यालयदेखि इलाका प्रहरी कार्यालय, चौकी र सीमावर्ती इकाइसम्मको परिचालन, समन्वय र नियमित समीक्षा गर्दै प्रहरी सेवामा एकरूपता ल्याउने प्रयास गरिएको छ।
सीमा सुरक्षा र अपराध नियन्त्रणमा जोड
भारतसँग खुला सीमा जोडिएको मधेश प्रदेशमा लागूऔषध ओसारपसार, तस्करी, मानव बेचबिखन, वित्तीय अपराध तथा अन्य अन्तरदेशीय आपराधिक गतिविधि नियन्त्रण चुनौतीपूर्ण मानिन्छ। यस्ता गतिविधि नियन्त्रणका लागि सीमा क्षेत्रमा निगरानी, गस्ती, सूचनाको आदानप्रदान र अन्य सुरक्षा निकायसँगको समन्वयलाई प्रभावकारी बनाउने प्रयास गरिएको छ। त्यसैगरी फरार प्रतिवादी पक्राउ, अपराध अनुसन्धानको गुणस्तर सुधार, पीडितलाई न्याय प्रक्रियामा सहजीकरण तथा प्रहरी कर्मचारीका गुनासा सम्बोधन गर्ने विषयलाई पनि प्राथमिकतामा राखिएको छ।
प्रविधि र नागरिकमैत्री प्रहरी सेवामा प्राथमिकता
बढ्दो साइबर अपराध, अनलाइन ठगी र सामाजिक सञ्जालको दुरुपयोगलाई ध्यानमा राख्दै डिजिटल सुरक्षासम्बन्धी सचेतना तथा प्रविधिको प्रयोगमा जोड दिइएको छ। विद्यालय र समुदायस्तरमा साइबर सुरक्षा, लागूऔषध दुर्व्यसन, महिला तथा बालबालिकाको सुरक्षा र ट्राफिक सचेतनासम्बन्धी कार्यक्रममार्फत नागरिकसँगको सम्बन्ध सुदृढ गर्ने प्रयास भइरहेको छ।
मासिक मूल्याङ्कनमा पहिलो स्थान हासिल गर्नु मधेश प्रहरीका लागि महत्वपूर्ण उपलब्धि भए पनि यसको वास्तविक सफलता नागरिकले अनुभूति गर्ने सुरक्षा र सेवाको गुणस्तरमा निर्भर रहनेछ। डीआईजी अधिकारीको नेतृत्वमा प्राप्त यो नतिजाले मधेश प्रहरीलाई उत्कृष्टता कायम राख्ने चुनौतीसँगै नागरिकको विश्वास अझ बलियो बनाउने अवसरसमेत दिएको छ।
