काठमाडौँ ,१४ मंसिर । लैंगिक हिंसाविरुद्धको १६ दिने अभियानको उद्घाटन समारोहमा दिएको अभिव्यक्तिका कारण आलोचनामा परेपछि प्रधानमन्त्री सुशीला कार्कीले औपचारिक स्पष्टीकरण जारी गरेकी छन्। आइतबार सामाजिक सञ्जालमार्फत उनले आफ्नो भनाइ कुनै पनि धर्म वा समुदायलाई लक्षित गरेर गरिएको नभएको स्पष्ट गर्दै धार्मिक सद्भाव जोगाइराख्न सबैलाई आग्रह गरेकी हुन्।
प्रधानमन्त्री कार्कीले लेखेकी छन्,
“नमस्कार! लैंगिक हिंसाविरुद्धको १६ दिने अभियान शुभारम्भका क्रममा मैले दिएको अभिव्यक्तिमा रहेर विभिन्न टिप्पणी भएका रहेछन्। कुनै पनि धर्म वा समुदायलाई होच्याउने मेरो आशय र नियत होइन, छैन। सबै धर्मप्रति मेरो उत्तिकै सम्मान छ। शान्ति, सद्भाव र सहिष्णुता कायम राख्न सबैमा विनम्र अनुरोध छ।”
प्रधानमन्त्री कार्कीले गत मंगलबार अन्तर्राष्ट्रिय महिला हिंसा अन्त्य दिवसको अवसरमा बोल्दै मुस्लिम समुदायको सन्दर्भमा दिएको अभिव्यक्ति सार्वजनिक भएलगत्तै सामाजिक सञ्जालमा मुस्लिम समुदायसहित विभिन्न समूहबाट प्रतिक्रिया आएका थिए। मुस्लिम समाजका अगुवाहरूले पत्रकार सम्मेलनमार्फत प्रधानमन्त्रीको अभिव्यक्तिप्रति कडा आपत्ति जनाउँदै यसको स्पष्टिकरण माग गरेका थिए।
उक्त परिस्थितिलाई मध्यनजर गर्दै प्रधानमन्त्री कार्कीले उत्पन्न विवादका विषयमा स्पष्टीकरण सार्वजनिक गरेकी हुन्। उनका अनुसार अभियानको सन्दर्भमा गरिएको अभिव्यक्ति कुनै पनि समुदायलाई लक्षित थिएन र राज्यको प्रमुखको हैसियतले धार्मिक सद्भावलाई सर्वोपरि मान्ने प्रतिबद्धता निरन्तर रहनेछ।
