बारा, १४ मंसिर ।
जिल्ला प्रहरी कार्यालय बाराले प्रसौनी गाउँपालिका–६, भलुही चोक नजिक भएको राम किशोर सिंहको विभत्स हत्यामा संलग्न दुई अभियुक्तलाई पक्राउ गरेको छ। मंसिर ११ गते बेलुका करिब ८:२५ बजे KIRAN BEVERAGE NEPAL PVT. LTD. (पानी फ्याक्ट्री) भन्दा करिब २५ मिटर उत्तरतर्फ रहेको खाल्डोमा फ्याक्ट्रीका मेनेजर नरसिंह सिंहका ५० वर्षका छोरा राम किशोर सिंह हत्या गरिएको अवस्थामाः फेला परेका थिए।
घटना विवरण
फ्याक्ट्रीका चालकका रूपमा कार्यरत पर्सा, वीरगंज–२२ मनियारीका २१ वर्षीय राजन कुमार राम र उनका साथी प्रमोद साह तुरहाले धारिलो हतियार र इँट प्रयोग गरी हत्या गरेको प्रारम्भिक अनुसन्धानबाट खुलेको छ।
राजन कुमार राम र मृतक सिंहबीच विगतदेखि विभिन्न विषयमा विवाद भइरहेको बताइएको छ। गत गढीमाई मेला समयमा गाडीको कलच प्लेट जलाएको विषयमा विवाद भएको र पछि फ्याक्ट्रीले तोकेको मूल्यभन्दा महँगोमा पानी बेच्ने गरेको जानकारी मृतकले पाएपछि ८ मंसिरमा राजनलाई कामबाट हटाइएका थिए। ११ मंसिरमा हिसाब–किताब समायोजन गरी रकम फछौट गरिएको थियो।
यसै रिसईवीलाई कारण बनाई राजन र उनको साथी प्रमोदले वीरगंजमा बसेर मदिरा सेवन गर्दै हत्या योजना बनाएर सोही रात करिब ८:२५ बजे फ्याक्ट्रीमै पुगेर सिंहको विभत्स हत्या गरेको अनुसन्धानले देखाएको हो।
प्रहरीको कारबाही
१२ मंसिर बिहान ७:५७ बजे प्राप्त सूचनाका आधारमा जिल्ला प्रहरी कार्यालय बाराबाट खटिएको टोलीले तत्काल घटनास्थल अनुसन्धान गरी फरार अभियुक्तहरूको खोजी थालिएको थियो।
समन्वयका लागि जिल्ला प्रहरी कार्यालय पर्सासँग समेत सहकार्य गरिएको थियो।
त्यसक्रममा भारत तर्फ भाग्दै गरेका मुख्य अभियुक्त राजन कुमार रामलाई पर्सा, छिपहरमाई–५ भिस्वा नाकाबाट पक्राउ गरियो। त्यस्तै, उनका साथी प्रमोद साह तुरहालाई वीरगंज महानगरपालिका–२२ मा लुकेर बसेको अवस्थामा पक्राउ गरिएको प्रहरी निरीक्षक तथा सूचना अधिकारी खेम प्रसाद नेपालको भनाइ छ।
बरामद वस्तु
- रगत लागेका फलामका छुरा – १ थान
- रगत लागेको इँट – १ थान
दुवै अभियुक्तलाई कर्तव्य ज्यान मुद्दामा बारा जिल्ला अदालतबाट ७ दिनको म्याद लिई थप अनुसन्धान भइरहेको प्रहरीले जनाएको छ।
