(ट्राफिक प्रहरीको लापरबाहीले वीरगञ्ज बसपार्क अस्तव्यस्त : पैदलयात्रीलाई हिँड्नै सकस, स्थानीय आक्रोशित)
वीरगञ्ज, जेठ ५।पर्साको मुख्य व्यापारिक तथा आवागमन केन्द्र मानिने वीरगञ्ज बसपार्क क्षेत्रमा ट्राफिक व्यवस्थापन अत्यन्तै कमजोर बन्दै गएको भन्दै स्थानीयवासी, व्यवसायी तथा यात्रुहरूले तीव्र असन्तुष्टि व्यक्त गरेका छन्। बसपार्क क्षेत्रमा खटिएका ट्राफिक प्रहरी कर्मचारीको ड्युटी क्रममा चरम लापरबाही देखिएको आरोप लागेसँगै सडक व्यवस्थापन पूर्ण रूपमा अस्तव्यस्त बनेको स्थानीयहरूको गुनासो छ।
विशेषगरी बसपार्क आसपासका मुख्य सडक, जेब्रा क्रसिङ, पैदलमार्ग तथा सार्वजनिक यात्रु चढ्ने–ओर्लने स्थानमा सवारीसाधनको अनियन्त्रित भीडका कारण सर्वसाधारणलाई आवतजावत गर्न समेत कठिन भएको देखिन्छ। बिहानदेखि साँझसम्म सवारीको जथाभावी पार्किङ, बीच सडकमा यात्रु ओराल्ने तथा चढाउने प्रवृत्तिले सडक दुर्घटनाको जोखिम समेत बढाएको स्थानीयले बताएका छन्।
स्थानीयवासीका अनुसार ट्राफिक प्रहरीको उपस्थिति भए पनि प्रभावकारी व्यवस्थापन हुन सकेको छैन। कतिपय ट्राफिक प्रहरी मोबाइलमा व्यस्त रहने, सवारीलाई नियम उल्लंघन गर्न छुट दिने तथा भीड व्यवस्थापनमा चासो नदिने गरेको आरोप नागरिकहरूले लगाएका छन्।
विशेषगरी ट्राफिक प्रहरी पप्पु कुमार यादवमाथि ड्युटीमा गम्भीर लापरबाही गरेको आरोप स्थानीयस्तरमा उठ्न थालेको छ।
बसपार्क क्षेत्रमा रहेको जेब्रा क्रसिङमै सवारीसाधन रोकिँदा विद्यार्थी, वृद्धवृद्धा, महिला तथा सर्वसाधारणले सडक पार गर्न निकै सास्ती खेप्नुपरेको अवस्था छ। पैदलमार्गमा मोटरसाइकल तथा ठेला पार्क गरिने कारण पैदलयात्री बाध्य भएर मुख्य सडक प्रयोग गर्नुपर्ने अवस्था सिर्जना भएको छ।
एक स्थानीय व्यवसायीले भने, “यहाँ ट्राफिक नियम लागू भएको जस्तो नै देखिँदैन। जेब्रा क्रसिङमा गाडी रोकिन्छ, पैदलमार्गमा मोटरसाइकल राखिन्छ, ट्राफिक प्रहरी भने हेरेर बस्छन्। दुर्घटना भए मात्रै प्रशासन जाग्ने हो कि भन्ने डर लागेको छ।”
यात्रुहरूका अनुसार बसपार्क क्षेत्रमा सवारीको अव्यवस्थित सञ्चालनले दैनिक जाम बढ्दो छ। सार्वजनिक बस, ई–रिक्सा, मोटरसाइकल तथा मालवाहक गाडी एउटै स्थानमा जथाभावी रोकिने गरेका कारण सडक साँघुरो बन्न पुगेको छ। कतिपय अवस्थामा एम्बुलेन्स तथा आपतकालीन सवारीसमेत जाममा फस्ने गरेको देखिन्छ।
स्थानीय नागरिकहरूले जिल्ला ट्राफिक प्रहरी कार्यालय पर्सा तथा सम्बन्धित निकायलाई तत्काल बसपार्क क्षेत्रको ट्राफिक व्यवस्थापन सुधार गर्न माग गरेका छन्। उनीहरूले नियमित अनुगमन, अवैध पार्किङ नियन्त्रण, पैदलमार्ग खाली गराउने तथा जेब्रा क्रसिङको प्रभावकारी कार्यान्वयन गर्नुपर्ने बताएका छन्।
वीरगञ्जको मुख्य प्रवेशद्वारको रूपमा परिचित बसपार्क क्षेत्रको ट्राफिक अवस्था दिनप्रतिदिन बिग्रँदै जाँदा सर्वसाधारणमा आक्रोश बढिरहेको छ। सम्बन्धित निकायले समयमै ध्यान नदिए भविष्यमा ठूलो दुर्घटना हुन सक्ने भन्दै स्थानीयले चेतावनी दिएका छन् ।
