पर्सा , २४ असोज । पर्साको जगरनाथपुर गाउँपालिकाका पूर्वअध्यक्ष तथा नेकपा एमालेका नेता जालिम मियाँका दुई छोरालाई आफ्नै सालीको मृत्यु प्रकरणमा जिल्ला अदालत पर्साले पुर्पक्षका लागि कारागार चलान गर्न आदेश दिएको छ।
कर्तव्य ज्यान तथा जबर्जस्ती करणीसम्बन्धी कसुरको आरोपमा जिल्ला न्यायाधीश ठाकुरप्रसाद खरेलको इजलास नम्बर ८ ले शुक्रबार दुवै दाजुभाइलाई मुद्दाको अन्तिम फैसला नभएसम्म थुनामा राखेर पुर्पक्ष गर्न आदेश दिएको हो।
यस प्रकरणमा जालिम मियाँका कान्छा छोरा जाफिर मियाँ मन्सुरीलाई प्रहरीले गत १५ गते वीरगन्जबाट पक्राउ गरेको थियो। जगरनाथपुर गाउँपालिका–५ घर भई हाल वीरगन्ज महानगरपालिका–१३ मुर्लीमा बस्दै आएका करिब ४० वर्षीय जाफिरलाई ज्यानसम्बन्धी कसुर तथा सार्वजनिक न्यायविरुद्धको कसुरमा अनुसन्धानका लागि नियन्त्रणमा लिएको थियो।
भैंसी तथा पाडाको व्यापार गर्दै आएका जाफिरमाथि जगरनाथपुर गाउँपालिका–४ निवासी आफ्नै सालीको मृत्यु घटनामा संलग्न रहेको आरोप छ। यसअघि प्रहरीले उनका दाजु नासिर अहमद मन्सुरीलाई असोज ३ गते पक्राउ गरेको थियो। उनी पनि घटनासम्बन्धी अनुसन्धानका क्रममा प्रहरी नियन्त्रणमा थिए।
अदालतको आदेशपछि दुवै दाजुभाइ कारागार चलान भएका छन्। घटनामा आरोपित अन्य दुई जना भने अझै फरार रहेको र उनीहरूको खोजी कार्य जारी रहेको प्रहरीले जनाएको छ।
प्रहरीले घटनाबारे थप अनुसन्धान भइरहेको जनाएको छ। अदालतबाट पुर्पक्षका लागि थुनामा राख्ने आदेश हुनु दोषी ठहर हुनु होइन। मुद्दाको अन्तिम फैसला हुन बाँकी रहेकाले आरोपितहरूको कसुर अदालतबाट पुष्टि हुन बाँकी छ।
