🌺 प्रधानमन्त्री ओलीद्वारा हरितालिका तीजको शुभकामना 🌺

काठमाडौं ,१० भदौ ।
प्रधानमन्त्री केपी शर्मा ओलीले हरितालिका तीजको अवसरमा सम्पूर्ण दिदीबहिनीहरूलाई मंगलमय शुभकामना व्यक्त गरेका छन्। सामाजिक सञ्जालमार्फत शुभकामना व्यक्त गर्दै उनले तीजलाई केवल गीत–नृत्यको पर्व मात्र नभई व्रत, संयम र आत्म–अनुशासनसँग जोडिएको महत्वपूर्ण पर्वका रूपमा उल्लेख गरेका छन्।

उनका अनुसार प्राचीन कालमा पतिपत्नी दुवैले सप्तऋषिको पूजा गर्दै व्रत बस्ने चलन रहेको भए पनि समयक्रममा महिलामात्रै व्रत बस्ने परम्परा विकसित भएको हो। तीजलाई हाम्रो संस्कृतिले आत्मिक शुद्धता र दाम्पत्य जीवन सुदृढीकरण गर्ने व्रतोत्सवका रूपमा लिएको उनले स्मरण गराए।

पछिल्लो समयमा विज्ञानले पनि व्रतले शरीरलाई फाइदा पुर्‍याउँछ भन्ने तथ्य औंल्याउन थालेको उल्लेख गर्दै प्रधानमन्त्री ओलीले हरितालिका तीजले परिवारमा आत्मीयता, दाम्पत्य जीवनमा उल्लास र समाजमा सौहार्द फैलाउने विश्वास व्यक्त गरेका छन्।