बिरगञ्ज, २६ जेठ । जिल्ला प्रहरी कार्यालय पर्सा मातहत रहेको इलाका प्रहरी कार्यालय पटेर्वा सुगौलीले प्रहरी उत्प्रेरणा कार्यक्रम अन्तर्गत कार्यालयमा कार्यरत सम्पूर्ण प्रहरी कर्मचारीलाई खेलकुद पोशाक वितरण गरेको छ।
प्रहरी कर्मचारीहरूको शारीरिक तन्दुरुस्ती, कार्यक्षमता र मनोबल अभिवृद्धि गर्ने उद्देश्यले आयोजित कार्यक्रममा खेलकुद पोशाक हस्तान्तरण गरिएको हो। कार्यक्रममा सहभागी प्रहरी कर्मचारीहरूलाई नियमित व्यायाम तथा खेलकुद गतिविधिमा सक्रिय रहन प्रेरित गर्दै स्वस्थ जीवनशैली अपनाउन आग्रह गरिएको थियो।
प्रहरी संगठनभित्र अनुशासन, एकता, टोलीगत भावना तथा व्यावसायिक दक्षता विकासमा यस्ता कार्यक्रमले महत्वपूर्ण भूमिका खेल्ने विश्वास व्यक्त गरिएको छ। साथै, कर्मचारीहरूको मनोबल उच्च राख्दै सेवामुखी र प्रभावकारी प्रहरी सेवा प्रवाहमा टेवा पुर्याउने उद्देश्यले यस्ता उत्प्रेरणामूलक कार्यक्रमलाई आगामी दिनमा समेत निरन्तरता दिइने जनाइएको छ।
जिल्ला प्रहरी कार्यालय पर्साले प्रहरी कर्मचारीहरूको शारीरिक तथा मानसिक स्वास्थ्यलाई प्राथमिकतामा राख्दै विभिन्न कल्याणकारी र प्रेरणादायी कार्यक्रम सञ्चालन गर्दै आएको छ। यस्ता गतिविधिले प्रहरी संगठनलाई थप सक्षम, अनुशासित र जिम्मेवार बनाउने अपेक्षा गरिएको छ।
“स्वस्थ प्रहरी, सक्षम प्रहरी; सक्षम प्रहरी, सुरक्षित समाज” भन्ने मूल नारालाई आत्मसात गर्दै आयोजित उक्त कार्यक्रमलाई प्रहरी कर्मचारीहरूले सकारात्मक रूपमा लिएको जनाइएको छ।
