वीरगञ्ज,२४ पुस ।
वीरगञ्ज महानगरपालिका वडा नम्बर २८ स्थित ददरवनको सार्वजनिक जमिनको संरक्षणबारे महानगर प्रमुख राजेशमान सिंहले स्थलगत निरीक्षण गर्दै स्थानीयहरूसँग छलफल गरेका छन्।
स्थानीयहरूलाई सहभागी गराउँदै उनले सार्वजनिक जग्गाको अवस्था र अतिक्रमणबारे जानकारी लिएका हुन्। प्रमुख सिंहले सार्वजनिक जग्गाको संरक्षण गर्ने र अतिक्रमणमा परेका जमिनलाई पुनः प्राप्त गर्ने अभियानलाई प्राथमिकतामा राखेको बताएका छन्।
यसै क्रममा उनले बुधबार ददरवनको सार्वजनिक जग्गा र पोखरीको निरीक्षण गरेका थिए। सो अवसरमा प्रमुख सिंहसँग उनका सल्लाहकार हरी पोख्रेल र नगर प्रहरी पनि सहभागी थिए।
महानगर क्षेत्रमा रहेका सार्वजनिक जग्गाको संरक्षण अभियानअन्तर्गत प्रमुख सिंहले यसअघि विपि उद्यान पार्कको अतिक्रमित जमिन खाली गराइसकेका छन्। अभियानले स्थानीयको सकारात्मक सहभागिता पाउँदै आएको छ।
