बारामा जंगली हात्तीको आक्रमणमा चालकको मृत्यु, बाटो अवरुद्ध

समाचार

बारा, २४ कार्तिक ।
बारा जिल्लाको जितपुरसिमरा उपमहानगरपालिका–१६ काटघाटस्थित पूर्व–पश्चिम राजमार्गमा जंगली हात्तीको आक्रमणबाट एक ट्रक चालकको मृत्यु भएको छ।

आज बिहान करिब ८ः१५ बजेको समयमा ना.४ ख १८३० नम्बरको ट्रक चलाइरहेका जितपुरसिमरा उपमहानगरपालिका–१ निवासी करिब ४०/४२ वर्षीय राजकुमार चौधरीलाई हात्तीले आक्रमण गरेको प्रहरीले जनाएको छ। ट्रकमा हात्तीले आक्रमण गरेपछि चौधरी ट्रकबाट ओर्ली भाग्ने क्रममा राजमार्गदेखि करिब १०० मिटर दक्षिणतर्फको जंगलमा पुगेका थिए। त्यहीँ हात्तीको आक्रमणबाट उनको घटनास्थलमै मृत्यु भएको बारा प्रहरीले पुष्टि गरेको छ।

घटनाको जानकारी पाएपछि इलाका प्रहरी कार्यालय निजगढका प्रहरी निरीक्षक जीवन लामिछानेको कमाण्डमा सात जनाको प्रहरी टोली खटिएको र हात्ती धपाउने कार्य जारी रहेको प्रहरीले जनाएको छ।

सो घटनामा अन्य सवारी साधनमा पनि क्षति पुगेको प्रारम्भिक जानकारी आएको छ भने विस्तृत विवरण आउन बाँकी रहेको प्रहरीले बताएको छ। हात्तीको गतिविधिका कारण सो राजमार्गमा यातायात आवागमन अवरुद्ध भएको जनाइएको छ।

0Shares

Leave a Reply

Your email address will not be published. Required fields are marked *