काठमाडौँ, १६ पुस ।
सशस्त्र प्रहरी बल नेपाल (APF) ले आफ्नो स्थापना उद्देश्य, कर्तव्य र राष्ट्रप्रतिको समर्पणलाई भावनात्मक शब्दमार्फत पुनः उजागर गरेको छ। सशस्त्र प्रहरी जवान नामक सामाजिक सञ्जाल पेजमा सार्वजनिक गरिएको सन्देशले सुरक्षा निकायको भूमिका केवल बल प्रयोगमा सीमित नभई जनताको भरोसा र राष्ट्रको ढाल भएको स्पष्ट सन्देश दिएको छ।
उक्त सन्देशमा सशस्त्र प्रहरीको वर्दी लगाउनु मात्र सजिलो भए पनि त्यसलाई सम्मानका साथ बोक्न साहस, अनुशासन र बलिदान आवश्यक पर्ने उल्लेख गरिएको छ। संकटको समयमा देश र जनताको सुरक्षाका लागि अग्रपंक्तिमा उभिने सशस्त्र प्रहरीको जिम्मेवारी, मानसिक दबाब, थकान र जोखिमका बाबजुद पनि कर्तव्यबाट कहिल्यै नहट्ने प्रतिबद्धता भावपूर्ण शब्दमा प्रस्तुत गरिएको छ।
सन्देशमा भनिएको छ— “जब जनता सुरक्षित महसुस गर्छन्, त्यो हाम्रो विजय हो। जब राष्ट्र शान्त हुन्छ, त्यही हाम्रो गर्व हो।” यस अभिव्यक्तिले सशस्त्र प्रहरी बलको मूल ध्येय जनताको सुरक्षा र राष्ट्रको स्थायित्व रहेको स्पष्ट गर्छ।
सीमा सुरक्षा, विपद् व्यवस्थापन, शान्ति सुरक्षादेखि अपराध नियन्त्रणसम्म महत्वपूर्ण भूमिका निर्वाह गर्दै आएको सशस्त्र प्रहरी बल नेपाल आज जनआस्था र विश्वासको प्रतीकका रूपमा स्थापित हुँदै गएको देखिन्छ। सामाजिक सञ्जालमार्फत सार्वजनिक गरिएको यो सन्देशले सशस्त्र प्रहरीको मनोबल बढाउनुका साथै आम नागरिकमा सुरक्षा निकायप्रतिको भरोसा थप मजबुत बनाएको छ।
अन्त्यमा सन्देशले स्पष्ट गर्छ— “APF भनेको शक्ति मात्र होइन, APF भनेको भरोसा हो।”
