बिहार,२६ चैत ।
बिहारको अररिया जिल्लाको फारबिसगंजमा अत्यन्तै हृदयविदारक घटना सार्वजनिक भएको छ। स्थानीय बजार क्षेत्रमा एक व्यक्तिले अर्को व्यक्तिको सरेआम घाँटी रेटी हत्या गरेको र त्यसपछि सयौँ मानिसको अगाडि मृतकको टाउको बोकेर हिँडेको घटना बाहिरिएको हो।
घटनापछि मृतकका आफन्तहरूले पनि आरोपित व्यक्तिलाई खोजी गरी हत्या गरेको बताइएको छ। यस घटनाले क्षेत्रको सुरक्षा अवस्था र कानून व्यवस्थामाथि गम्भीर प्रश्न उठाएको छ।
प्रत्यक्षदर्शीका अनुसार घटनास्थलमा उपस्थित प्रहरी समेत अवस्था नियन्त्रणमा लिनभन्दा आफ्नो ज्यान जोगाउन व्यस्त देखिएका थिए।
यस घटनाप्रति प्रतिक्रिया दिँदै राष्ट्रिय जनता दल (आरजेडी) का नेता तेजस्वी यादवले सामाजिक सञ्जालमार्फत बिहारको कानून व्यवस्था अत्यन्त कमजोर भएको आरोप लगाएका छन्। उनले वर्तमान सत्ता गठबन्धन भारतीय जनता पार्टी (भाजपा) र जनता दल (युनाइटेड) (जेडीयू) माथि निशाना साध्दै राज्यमा अपराधका घटनाहरू बढ्दो क्रममा रहेको बताएका छन्।
यादवले दिनदहाडै हत्या, लुटपाट, बलात्कारजस्ता घटनाहरू बढिरहेको उल्लेख गर्दै अपराधीहरूमा कानूनको डर समाप्त भइसकेको दाबी गरेका छन्। उनले सत्ताधारी पक्ष ‘सीएम कुर्सी’को खेलमा व्यस्त हुँदा सर्वसाधारण नागरिक असुरक्षित महसुस गरिरहेको आरोप पनि लगाए।
त्यसैगरी उनले हालै सार्वजनिक भएको एक प्रचारात्मक फिल्मसँग घटनाको दृश्य मिल्दोजुल्दो रहेको उल्लेख गर्दै सामाजिक रूपमा विष फैलाउने खालका गतिविधिले यस्ता भयावह घटनालाई बढावा दिएको टिप्पणी गरेका छन्।
घटनापछि स्थानीय प्रशासनमाथि तत्काल सुरक्षा व्यवस्था सुदृढ गर्न दबाब बढेको छ भने यस विषयले राजनीतिक वृत्तमा तीव्र बहस सिर्जना गरेको छ।
