असार १५, काठमाडौं ।
प्रधानमन्त्री केपी शर्मा ओलीले आजको दिन — असार १५, राष्ट्रिय धान दिवस —लाई नेपाली कृषिको परम्परा र भविष्यको मिलन बिन्दुका रूपमा चित्रण गरेका छन्। परम्परागत रूपमा दहीचिउरा खाएर र माटोमा रोपाइँ गरेर मनाइने यो दिन अब केवल सांस्कृतिक पर्व मात्र नभई आधुनिक कृषि प्रणालीमा रूपान्तरणको प्रेरणा दिने अवसर बन्नुपर्छ, प्रधानमन्त्री ओलीले बताएका छन्।
प्रधानमन्त्री ओलीले विदेशमा रहेको बेला सामाजिक सञ्जालमार्फत सन्देश दिँदै भने,
“आज असार १५, हाम्रो उत्पादन र पसिनाको पर्व, धान दिवस। माटोमा जीवनको सुगन्ध, पानीमा पसिनाको पूजा र यसबाट धानका बाला झुलाउने सपना – यो हाम्रो परम्परादेखि चल्दै आएको रोपाइँ संस्कृति हो।”
उनले बाल्यकालको रोपाइँको स्मृति ताजा भएको उल्लेख गर्दै भने,
“आज देश बाहिर भए पनि, बाल्यकालदेखिका रोपाइँको सम्झना आइरहेको छ।”
तर अब, परम्परासँगै भविष्यतर्फ अघि बढ्नुपर्ने बताउँदै प्रधानमन्त्री ओलीले आधुनिक कृषि प्रणाली अपनाउनुपर्ने आवश्यकता औंल्याए। उनका अनुसार अब कृषिमा प्रविधिको प्रयोगमार्फत उत्पादन वृद्धिमा जोड दिनुपर्ने समय आएको छ।
“हामीले रोपाइँ र समग्र कृषिलाई आधुनिक र प्रविधिको प्रयोगबाट उत्पादन बढाउने बाटोमा लैजानु पर्छ। त्यसका लागि सरकारले कृषि आधुनिकीकरणको कार्यक्रम ल्याएको छ,” प्रधानमन्त्री ओलीले भने।
उनले धान दिवसलाई राष्ट्रिय गौरवको पर्वका रूपमा विकास गर्ने योजनाबारे पनि उल्लेख गरे। उनका अनुसार सरकारको लक्ष्य कृषिमा आत्मनिर्भरता, नवप्रवर्तन र युवाको आकर्षण बढाउनेतर्फ केन्द्रित छ।
प्रधानमन्त्रीले सम्पूर्ण देशवासीलाई असार १५, दहीचिउरा खाने दिन तथा राष्ट्रिय धान दिवसको अवसरमा शुभकामना दिँदै कृषकहरूको श्रम र योगदानप्रति सम्मान प्रकट गरे।
“कृषिलाई आधुनिक र प्रविधिमा आधारित बनाएर उत्पादन बढाउँ, असार १५, दहीचिउरा खाने दिन तथा धान दिवसको सबैलाई शुभकामना।”
नेपालमा हरेक वर्ष असार १५ लाई राष्ट्रिय धान दिवसका रूपमा मनाउने गरिन्छ। यो दिन देशभर किसान, सरकारी निकाय, विद्यार्थी र सर्वसाधारणले खेतमा रोपाइँ गरी, माटोमा खेली र दहीचिउरा खाई हर्षोल्लासपूर्वक दिवस मनाउने चलन छ। यसले कृषि पेशाको सम्मान मात्र होइन, खाद्य सुरक्षाको मूल आधारलाई समेत जोड्ने काम गर्छ।
यस वर्षको धान दिवसमा प्रधानमन्त्री ओलीको सन्देशले परम्परा र प्रविधिको समायोजन गर्दै समृद्ध नेपालको बाटो कृषिमै रहेको सन्देश दिएको छ।
