पर्सा,३ माघ ।
पर्सा प्रहरीले लागु औषध सहित वीरगञ्ज महानगरपालिका वडा नं.१ छपकैयाका एक जना मानिसलाई पक्राउ गरेको छ।
विशेष सूचनाको आधारमा मंगलवार साझ ७:३० बजेको समयमा वीरगञ्ज महानगरपालिका वडा नं.८ पानीटंकी सडकखण्डमा जिल्ला प्रहरी कार्यालयबाट खटिएको टोलीले चेकजाँच गर्ने क्रममा रिक्सामा लुकाई छिपाई राखिएको लागु औषध नुरफिन ५०० एम्पुल, फेनारगन ५०० एम्पुल र डाइजेल्याब ५०० एम्पुल गरी जम्मा १५०० एम्पुल फेला परेको हुँदा रिक्सा चालक सहित सो लागु औषध नियन्त्रणमा लिएको पर्सा प्रहरीका प्रवक्ता प्रहरी नायब उपरीक्षक(डिएसपी ) कुमार बिक्रम थापाले जनाएका छन् ।
रिक्सा चालक वीरगञ्ज महानगरपालिका वडा नं.१ छपकैया निवासी वर्ष ५० को बब्लुलाल कर्ण रहेको डिएसपी थापाले जनाएका छन् ।
उल्लेखित लागु औषध सहित कर्णलाई नियन्त्रणमा लिई निज विरुद्द लागु औषध सम्बन्धी कसूरमा थप अनुसन्धान कार्य भैरहेको जिल्ला प्रहरी कार्यालय पर्साले जनाएको छ।
