पर्सा, १३ असोज ।
आगामी महान चाडपर्व विजयादशमी, शुभ दिपावली र छठ पर्वलाई शान्तिपूर्ण, सभ्य र व्यवस्थित रुपमा मनाउन पर्सा जिल्ला प्रशासन कार्यालयले जिल्लावासीलाई विशेष अनुरोध गरेको छ। प्रमुख जिल्ला अधिकारी (सिडिओ) तोय नारायण सुवेदीद्वारा हस्ताक्षरित सूचना असोज १२ गते सार्वजनिक गर्दै जिल्ला प्रशासन कार्यालयले जिल्लावासीलाई शुभकामना व्यक्त गर्दै सरसफाइ, सुरक्षा र सामाजिक अनुशासनमा ध्यान दिन आग्रह गरेको हो।
सुवेदीले विज्ञप्तिमार्फत सम्पूर्ण पर्सावासी बुवाआमा, दाजुभाइ र दिदीबहिनीहरुलाई सुस्वास्थ्य, दीर्घायु र उत्तरोत्तर प्रगतिका लागि शुभकामना दिंदै चाडपर्वलाई अनुशासित, सभ्य र सुरक्षित वातावरणमा मनाउन अनुरोध गरेका छन्।
सूचनामा प्रमुख रुपमा उल्लेख गरिएका बुँदाहरु यसप्रकार छन् :
१. शान्ति सुरक्षा कायम गर्न विशेष आग्रह
जिल्लाको शान्ति सुरक्षामा खलल पर्ने कुनै पनि गतिविधि नगर्न र नगराउन अनुरोध गरिएको छ। कसैले यस्तो कार्य गर्ने वा गर्ने प्रयास गरेमा तुरुन्त नजिकको सुरक्षा इकाईलाई खबर गर्न आग्रह गरिएको छ।
२. मठमन्दिर तथा धार्मिक स्थलमा अनुशासन
मठमन्दिरमा पूजा आजा गर्दा भीडभाड नगरी व्यवस्थित लाइनमा बस्न, मादक पदार्थ सेवन नगर्न र ध्वनी प्रदूषण हुने गरी डि.जे वा अन्य उच्च ध्वनि साउण्ड सिस्टम प्रयोग नगर्न चेतावनी दिइएको छ। साथै, दुर्व्यवहार, अपशब्द प्रयोग वा अमर्यादित कार्य नगर्न र नगराउन भनिएको छ। भीड हुने ठाउँमा चोरीका घटना हुन सक्ने भएकाले गरगहना तथा अन्य मूल्यवान सम्पत्तिको सुरक्षा गर्न पनि सचेत गराइएको छ।
३. स्वास्थ्य र सरसफाइमा सतर्कता
सदरमुकाम वीरगंज क्षेत्रमा अझै झाडापखाला र हैजाको प्रकोप रहेको भन्दै सरसफाइमा विशेष ध्यान दिन भनिएको छ। खाना खानुअघि साबुनपानीले राम्ररी हात धुन, उमालेको वा क्लोरिनयुक्त पानी मात्र पिउन र स्वास्थ्यवर्दक खाद्यपदार्थ सेवन गर्न सिडिओ सुवेदीले अनुरोध गरेका छन्।
४. चोरी र आपराधिक गतिविधिबाट सावधानी
चाडपर्वको भीडभाडमा चोरी तथा आपराधिक घटना हुन सक्ने भएकाले विशेष सतर्कता अपनाउन र कुनै घटना घटेमा वा घट्न सक्ने आशंका भएमा तुरुन्त नजिकको सुरक्षा निकायलाई जानकारी गराउन भनिएको छ।
५. सार्वजनिक यातायातमा शिष्टाचार र पारदर्शिता
चाडपर्वमा यात्रु चाप बढ्ने भएकाले सवारीसाधन व्यवसायीलाई इमान्दारिताका साथ सेवा दिन भनिएको छ। यात्रुहरुले सिट नपाउने, बढी भाडा तिर्नुपर्ने वा समयमा गाडी नगुड्ने समस्या भोगेमा तत्काल सुरक्षा निकायलाई जानकारी गराउन अनुरोध गरिएको छ।
६. सुरक्षा निकायसँग तुरुन्त सम्पर्क राख्ने व्यवस्था
जिल्लामा शान्ति सुरक्षा भंग गर्ने गतिविधि भएमा वा हुने आशंका भएमा तुरुन्तै जिल्ला प्रशासन कार्यालय, जिल्ला प्रहरी कार्यालय, सशस्त्र प्रहरी बल नेपाल नं. १३ गण, वा प्रहरी कन्ट्रोल नम्बर १०० मा सम्पर्क गर्न सकिने व्यवस्था गरिएको छ।
पर्सा प्रशासनले चाडपर्वलाई उल्लासमय, सुरक्षित र अनुशासित बनाउन सम्पूर्ण जिल्लावासीको सक्रिय सहयोग अपरिहार्य रहेको भन्दै धन्यवाद ज्ञापन गरेको छ।
