काठमाडौं, २४ कात्तिक । नेपाल प्रहरीको ३३औं महानिरीक्षक (आईजीपी) का रूपमा दानबहादुर कार्की नियुक्त भएका छन्। सोमबार बसेको मन्त्रिपरिषद्को बैठकले कार्कीलाई नेपाल प्रहरीको नेतृत्व सुम्पने निर्णय गरेको हो।
काठमाडौं उपत्यका प्रहरी कार्यालय रानिपोखरीमा कार्यरत प्रहरी अतिरिक्त महानिरीक्षक (एआईजी) कार्की आईजीपीका प्रमुख दाबेदार मानिएका थिए। मन्त्रिपरिषद्को निर्णयपछि कार्कीले २७ कात्तिकबाट औपचारिक रूपमा प्रहरी संगठनको नेतृत्व सम्हाल्ने भएका छन्।
सञ्चार, सूचना तथा प्रविधि मन्त्री जगदीश खरेलका अनुसार वर्तमान आईजीपी चन्द्रकुवेर खापुङ ३० वर्षे सेवा अवधिका कारण आगामी २६ कात्तिक राति १२ बजेदेखि अनिवार्य अवकाशमा जाने भएकाले सरकारले नयाँ आईजीपीको नियुक्ति गरेको हो।
कार्की १८ चैत २०५४ मा प्रहरी इन्सपेक्टरको रूपमा संगठनमा प्रवेश गरेका थिए। इमान्दार, अनुशासित र कर्मनिष्ठ प्रहरीका रूपमा चिनिएका कार्कीको नेतृत्व अवधि करिब साढे दुई वर्ष रहनेछ। विद्यमान प्रहरी नियमावलीअनुसार उनी १७ चैत २०८४ सम्म सेवा अवधिमा रहने छन्।
