मंसिर १३, काठमाडौँ ।
अन्तरदेशीय खुला सीमाका कारण हुने पशु तथा कृषिजन्य पदार्थको अवैध ओसारपसार नियन्त्रणका विषयमा सशस्त्र प्रहरी महानिरीक्षक (आईजीपी) राजु अर्यालको प्रमुख आतिथ्यमा आयोजित अन्तरक्रिया कार्यक्रम सफलतापूर्वक सम्पन्न भएको छ।
सशस्त्र प्रहरी बल नेपालले आयोजना गरेको उक्त कार्यक्रममा सीमाबाट हुने अवैध गतिविधि नियन्त्रणमा सुरक्षातन्त्र, स्थानीय प्रशासन, कृषि तथा पशु सेवा निकायहरूबीच समन्वय र सहकार्यलाई थप प्रभावकारी बनाउने विषयमा विस्तृत छलफल गरिएको थियो।
कार्यक्रममा सहभागी सरोकारवाला निकायका प्रतिनिधिहरूले खुला सीमाको दुरुपयोग गरी पशु, दुधजन्य तथा विभिन्न कृषिजन्य सामग्रीको अनियमित ओसारपसार बढ्दो चुनौती बनेको उल्लेख गर्दै नियन्त्रण तथा निगरानीमा प्रविधिको प्रयोग, संयुक्त अनुगमन र द्रुत सूचना आदान–प्रदानलाई आवश्यक रहेको जनाए।
आईजीपी अर्यालले सशस्त्र प्रहरी बल सीमा सुरक्षामा समर्पित रहँदै अवैध कारोवार नियन्त्रणमा शून्य सहनशीलताको नीतिसहित कार्यरत रहेको बताउँदै सरोकारवाला सबै निकायबीचको समन्वय नै सफलताको प्रमुख आधार भएको बताए।
अन्त्यमा, अवैध ओसारपसार नियन्त्रण तथा सीमाको समुचित व्यवस्थापनका लागि संयुक्त कार्ययोजना प्रभावकारी रूपमा कार्यान्वयन गर्ने सहमति साथ कार्यक्रम सम्पन्न भएको सशस्त्र प्रहरी बलले जनाएको छ।
