बारा, १५ मंसिर ।
सशस्त्र प्रहरी बल, नेपाल बाराले पछिल्लो चेकजाँच तथा विशेष सूचनाका आधारमा गरिएको कारबाहीमार्फत ६ लाख रुपैयाँभन्दा बढी मूल्य बराबरका अवैध सामानहरू बरामद गरेको छ। बाराका प्रमुख प्रहरी उपरीक्षक खुमबहादुर केसीको समन्वय र निर्देशनमा विभिन्न स्थानमा खटिएको टोलीहरूले उक्त अवैध सामान नियन्त्रणमा लिई सम्बन्धित निकायमा बुझाउने प्रक्रिया अघि बढाएको जनाएको छ।
१. यात्रुवाहक बसबाट करिब २ लाख ६४ हजार मूल्य बराबरको अवैध सामान बरामद
मिति २०८२ मंसिर १५ गते अन्दाजी ०८:४५ बजे, जितपुरसिमरा उपमहानगरपालिका–७ लल्कापुलस्थित वीरगञ्ज–पथलैया सडकखण्डमा सशस्त्र प्रहरी बल सशस्त्र बेश जितपुरका स.प्र.ना.उ.(डिएसपी ) खेमराज ठकुल्लाको कमाण्डमा खटिएको टोलीले चेकपोइन्ट राखी गरिएको चेकजाँचका क्रममा भारतबाट अबैध रूपमा भन्सार छली नेपाल प्रवेश गरेको यात्रुवाहक बसको डिक्कीभित्र लुकाइ–छिपाइ ल्याइएका सामान बरामद गरेको हो।
बरामद सामानहरूमा—
- विभिन्न थानका कपडा,
- फलसिङ लाइट,
- एयरपोड्स प्रो (AirPods Pro)
समेत रहेका छन्। सबैको अनुमानित मूल्य रु. २,६३,९००/- रहेको छ। सामान सुरक्षा बेश जितपुरमा राखी आवश्यक कारबाही अघि बढाइएको सशस्त्र प्रहरीले जनाएको छ।
२. खाली टिनको घरबाट २ लाख ६४ हजार बराबरको पाम आयलसहित अन्य सामान बरामद
मिति २०८२ मंसिर १३ गते अन्दाजी ७:३० बजे, जितपुरसिमरा उपमहानगरपालिका–२ निम्बु फार्मस्थित व्यक्ति बसोबास नगरेको टिनले छाएको घरमा विशेष सूचनाका आधारमा सशस्त्र प्रहरी बेश जितपुरबाट डिएसपी खेमराज ठकुल्लाको कमाण्डमा खटिएको टोलीले छापा मारी ठूलो परिमाणमा अवैध सामान बरामद गरेको हो।
वडा नं. २ का अध्यक्ष धनबहादुर श्रेष्ठ तथा स्थानीयको उपस्थितिमा गरिएको खानतलासीबाट—
- २,६०० लिटर पाम आयल,
- ग्यास चुल्हो,
- प्लास्टिक पाइप,
- रु. २,०००/- मूल्य बराबरको १ साइकिल
समेत गरी कुल मूल्य रु. २,६४,०००/- बराबरको सामान फेला परेको हो। बरामद सबै सामग्री राजश्व अनुसन्धान कार्यालय पथलैया बुझाइएको छ।
३. भारत–नेपाल सीमा क्षेत्रबाट कपडा र पटाका बरामद
मिति २०८२ मंसिर १३ गते अन्दाजी १:१० बजे, कलैया उपमहानगरपालिका–१० कटहरिया चोक नजिकैको नेपाल–भारत सीमा क्षेत्रबाट टाउकोमा बोकी अवैध रूपमा नेपालतर्फ ल्याउँदै गरेका २ जनाबाट—
- कपडा,
- पटाका
जस्तै अवैध सामग्री बरामद गरिएको सशस्त्र प्रहरीले जनाएको छ। बरामद सामानको अनुमानित मूल्य रु. १,२०,०००/- रहेको छ।
सम्बन्धित निकायमा बुझाउने प्रक्रिया जारी
सशस्त्र प्रहरी बाराले पछिल्लो केही दिनयता बढिरहेको अवैध उतारचढाव, भन्सार छली र गैरकानुनी वस्तु ओसारपसार नियन्त्रण गर्न चेकजाँच कडाइ गरिएको बताएको छ। बरामद सबै सामान आवश्यक कागजी प्रक्रिया पूरा गरी सम्बन्धित निकायमा बुझाउने कार्य जारी रहेको जानकारी सशस्त्र प्रहरीले दिएको छ।
सशस्त्र प्रहरीद्वारा निरन्तर संचालन भइरहेको यस्तो कारबाहीले सीमा सुरक्षा, राजस्व संरक्षण तथा अवैध कारोबार नियन्त्रणमा महत्वपूर्ण योगदान पुर्याइरहेको जनाएको छ।
