रसीद आलम ,काठमाडौं,१२ बैशाख । बागमती नदी किनारमा बसोबास गर्दै आएका सुकुम्बासी तथा भूमिहीन परिवारहरूको सुरक्षित स्थानमा व्यवस्थापनसहित स्थानान्तरण गर्ने कार्यमा नेपाल प्रहरीले सक्रिय भूमिका निर्वाह गरेको छ।
“प्रहरी हाम्रो साथी हो” भन्ने नारालाई व्यवहारमा उतार्दै प्रहरी टोलीले जमिन स्तरमै सहजीकरण, सुरक्षा व्यवस्थापन तथा मानवीय सहयोग प्रदान गरेको हो।
बागमती नदी किनारका बस्तीहरू वर्षेनी बाढी, डुबान तथा विभिन्न प्राकृतिक जोखिमका कारण असुरक्षित बन्दै आएका छन्। यस्ता जोखिम न्यूनीकरण गर्ने उद्देश्यले स्थानीय तह र सम्बन्धित निकायहरूले अघि बढाएको स्थानान्तरण अभियानमा नेपाल प्रहरीको सहभागिता उल्लेखनीय देखिएको छ।
स्थानान्तरणका क्रममा प्रहरी टोलीले भीड व्यवस्थापन, शान्ति सुरक्षा कायम गर्नुका साथै प्रभावित परिवारहरूको सामग्री सुरक्षित रूपमा सार्न सहयोग पुर्याएको छ। कतिपय स्थानमा वृद्ध, महिला र बालबालिकालाई प्राथमिकता दिँदै मानविय संवेदनशीलताका साथ सहयोग गरिएको प्रहरीले जनाएको छ।
प्रहरी अधिकारीहरूका अनुसार बस्ती हटाउने कार्य केवल प्रशासनिक प्रक्रिया मात्र नभई मानवीय पक्षसँग जोडिएको संवेदनशील विषय भएकाले संयमता र समन्वयका साथ कार्य गरिएको हो। “हामीले कुनै पनि प्रकारको अवाञ्छित घटना हुन नदिन सुरक्षा व्यवस्थापनलाई कडा बनाउनुका साथै स्थानीयसँग संवाद र सहकार्यलाई प्राथमिकता दिएका छौँ,” एक प्रहरी अधिकारीले बताए।
यस क्रममा स्थानीयवासीहरूलाई नयाँ स्थानमा सहज बसोबासका लागि आवश्यक समन्वयसमेत गरिएको छ। केही प्रभावित परिवारहरूले प्रारम्भिक रूपमा असन्तुष्टि जनाए पनि प्रहरीको संयमित व्यवहार र सहयोगी भूमिकाले वातावरण शान्त बनाएको देखिएको छ।
विशेषज्ञहरूका अनुसार बागमती किनारमा अनियन्त्रित बसोबासले दीर्घकालीन रूपमा वातावरणीय तथा मानवीय जोखिम बढाउँदै आएको थियो। यस्तो अवस्थामा सुरक्षित स्थानान्तरण अभियान आवश्यक भए पनि यसलाई मानवीय दृष्टिकोणबाट सञ्चालन गर्नु अत्यन्त महत्वपूर्ण हुन्छ।
यसै सन्दर्भमा नेपाल प्रहरीले देखाएको सहयोगी भूमिका सराहनीय मानिएको छ। प्रहरीको सक्रियता र संवेदनशील व्यवहारले राज्यप्रतिको जनविश्वास अभिवृद्धि गर्न समेत टेवा पुगेको सरोकारवालाहरू बताउँछन्।
बागमती नदी किनार व्यवस्थापनसँगै राजधानीको सौन्दर्य अभिवृद्धि, वातावरण संरक्षण तथा विपद् जोखिम न्यूनीकरणमा समेत सकारात्मक प्रभाव पर्ने अपेक्षा गरिएको छ। आगामी दिनमा पनि यस्ता मानवीय तथा सामाजिक कार्यमा नेपाल प्रहरीको सक्रिय सहभागिता रहने विश्वास व्यक्त गरिएको छ।
