रौतहट, साउन ९ ।
रौतहट जिल्लामा करेन्ट लागेर मृत्यु हुने घटनामा लगातार वृद्धि भइरहेका सन्दर्भमा जिल्ला प्रहरी कार्यालय, रौतहटले सर्वसाधारणलाई सचेत रहन आग्रह गरेको छ । प्रहरी कार्यालयका अनुसार आर्थिक वर्ष २०८१/८२ मा करेन्ट लागेर २३ जनाको ज्यान गएको थियो भने चालु आर्थिक वर्ष २०८२/८३को हालसम्मको अवधिमा मात्र ४ जनाको ज्यान गइसकेको छ ।
यस्ता घटनाबाट बच्नका लागि सावधानी अपनाउन अत्यन्त आवश्यक भएको भन्दै प्रहरीले निम्न सावधानीहरू पालना गर्न अनुरोध गरेको छः
- खाली खुट्टा वा पानी जमेको स्थानमा बिजुलीको काम नगर्नुहोस् ।
- मर्मत कार्य सधैं दक्ष विद्युत प्राविधिकबाट मात्र गराउनुहोस् ।
- कमसल, पुराना वा जथाभावी जोडजाड गरिएको तार प्रयोग नगर्नुहोस् ।
- सम्भव भएसम्म अन्डरग्राउन्ड वायरिङ्गको व्यवस्था गर्नुहोस् ।
- विद्युत बोर्ड साना बालबालिकाले नछुने गरी सुरक्षित स्थानमा राख्नुहोस् ।
- जथाभावी तार झुण्ड्याउने वा खोलामा पार्ने कार्य नगर्नुहोस् ।
- खेतमा सिँचाइका लागि सिँचाइ मिटरको प्रयोग गरी मात्र मोटर चलाउनुहोस् ।
- रातिको समयमा वा अँध्यारोमा बिजुली मर्मत, तार चलाउने वा खेतमा पानी पटाउने कार्य नगर्नुहोस् ।
- खेतमा सिँचाइ गर्दा अनिवार्य रूपमा एक जना व्यक्ति उपस्थित गराउनुहोस् ।
- विद्युत पोलबाट हुकिङ गरी चोरी गर्ने कार्य नगर्नुहोस् ।
- हातले छुन सकिने वा खुट्टा लाग्न सक्ने स्थानमा तार, स्विच वा बोर्ड नराख्नुहोस् ।
जिल्ला प्रहरी कार्यालय, रौतहटले सबै नागरिकलाई आफ्नै सुरक्षाको लागि यी सावधानीहरू कडाइका साथ पालना गर्न अनुरोध गरेको छ ।
