बिरगंज, १ कार्तिक।
जिल्ला प्रहरी कार्यालय पर्साका प्रमुख प्रहरी उपरीक्षक (एसपी) सुदिपराज पाठकको नेतृत्वमा सञ्चालित तस्करी नियन्त्रण विशेष अभियानलाई थप प्रभावकारी बनाउँदै प्रहरीले पुनः उल्लेखनीय सफलता हासिल गरेको छ।
सोही अभियान अन्तर्गत वडा प्रहरी कार्यालय श्रीपुरका प्रमुख प्रहरी निरीक्षक श्याम कुमार बस्नेतको कमान्डमा खटिएको प्रहरी टोलीले मातहतका विभिन्न क्षेत्रबाट करिब ८ लाख रुपैयाँ बराबरका भन्सार छलीका विभिन्न सामानहरू बरामद गर्न सफल भएको हो। बरामद वस्तुहरूमा काजु, किराना सामग्री लगायतका दैनिक उपभोगका वस्तुहरू रहेका छन्, जसलाई आवश्यक कानूनी प्रक्रिया पूरा गरी भन्सार कार्यालयमा बुझाउने तयारी भइरहेको प्रहरीले जनाएको छ।
प्रहरीका अनुसार हाल पर्सा जिल्लामा तस्करी नियन्त्रणका लागि विशेष अभियान सञ्चालनमा रहेको छ। यो अभियान अन्तर्गत भारततर्फबाट भन्सार नतिरी नेपाल भित्र्याइने सामानहरू नियन्त्रणमा लिन दैनिक रूपमा प्रहरी टोलीहरू परिचालन भइरहेका छन्।
एसपी सुदिपराज पाठकले तस्करी नियन्त्रणलाई प्राथमिकतामा राख्दै जिल्लाभर निगरानी र कारवाहीलाई तीव्रता दिइएको जानकारी दिएका छन्। उनले भने,
“भन्सार छल्ने, तस्करी गर्ने तथा अवैध कारोबारमा संलग्न जोसुकै व्यक्तिमाथि पनि कानूनी कारवाही हुनेछ। प्रहरी सधैं कानूनको शासन र पारदर्शी व्यापारिक वातावरणका लागि प्रतिबद्ध छ।”
त्यस्तै, वडा प्रहरी कार्यालय श्रीपुरका प्रहरी निरीक्षक श्याम कुमार बस्नेतले टोलीको सक्रियताले तस्करी नियन्त्रणमा ठुलो सहयोग पुगेको बताएका छन्। उनले भने,
“हाम्रो टोलीले नियमित गस्ती, विशेष सूचनाका आधारमा निगरानी र चेकजाँचलाई अझ सशक्त बनाएको छ। यसरी बरामद भएका सामानहरूले तस्करी नियन्त्रणमा उल्लेखनीय प्रभाव पारेका छन्।”
प्रहरीले स्थानीयवासीहरूलाई पनि अवैध कारोबार, भन्सार छलजस्ता गैरकानूनी क्रियाकलापमा संलग्न नहुन र यस्ता गतिविधि देखिए वा जानकारी भएमा तुरुन्त नजिकको प्रहरी कार्यालयलाई खबर गर्न अनुरोध गरेको छ।
जिल्ला प्रहरी कार्यालय पर्साले हालैका दिनहरूमा तस्करी नियन्त्रण अभियानलाई निरन्तरता दिँदै विभिन्न इलाकाबाट लाखौँ मूल्य बराबरका अवैध सामानहरू नियन्त्रणमा लिएको छ। प्रहरीको सक्रियता र स्थानीयको सहकार्यका कारण सीमावर्ती क्षेत्रमा तस्करी नियन्त्रण अभियान थप प्रभावकारी बन्दै गएको छ।
